Товч тойм

• Монголын орчин үеийн утга зохиолыг үндэслэгчдийн нэг, 20-р зууны манлай монголч эрдэмтэн, Монголын шинжлэх ухааны зүтгэлтэн, зохиолч, орчуулагч, соён гэгээрүүлэгч. 1961 онд БНМАУ-ын ШУА-ийн жинхэнэ гишүүн, академичаар сонгогдсон.
• Англи, франц, герман, чех, польш, эсперанто, орос хэлийг гаргууд эзэмшсэн бөгөөд эсперанто хэлний өөрөө сурах бичиг зохиосон.
• 1929 онд байгуулсан Монголын зохиолчдын анхны дугуйлангийн гишүүн.
• Амьдралынхаа турш олон арван зохиол туурвиж, гадаадын олон зохиолчдын бүтээлүүдээс эх хэлнээ орчуулан уншигч олноо танилцуулсан.
• Тухайн үеийн БНМАУ болон ЗХУ-ын төрийн тэргүүнүүдийн зүгээс улс төрийн явуулгыг удаа дараа зохион байгуулж хувьсгалын эсэргүү, японы тагнуул, феодалын нийгмийг магтагч, үндэсний үзэлтэн, социалист монголын хөгжлийг үгүйсгэгч, Монгол Оросын найрамдлыг хялайн үзэгч зэргээр нэр зүүж хэлмэгдүүлж байсан. Хилс хэргээр 1937 онд баригдан алах ял авсан боловч шоронд хоригдож байгаад 1942 онд суллагдсан. Өөрийг нь гүтгэн доромжилсныг эсэргүүцэж, мөн нийгэмд байгаа цаг үеийн гажуудлын талаар шүүмжилж олон арван захидал, нийтлэл бичиж байв.
• "Үндэсний ухамсрыг эерэгээр төлөвшүүлэн чиглүүлж чадсанаар л монгол үндэстэн өөрийн бахархалтай байна" гэсэн үзэл санааг баримталж байсан.
• "Монгол үндэстний нэг гол баталгаа болох эх хэлээ үндсэн язгуураар нь хадгалан өвлүүлэх, ялангуяа Монгол үндэстний соёлын давтагдашгүй өв, дэлхийд хосгүй Монгол босоо бичгээ хамгаалан хойч үедээ үлдээвэл монгол хүний сэтгэхүй, сэтгэлгээ цэвэр байна" гэдэг байр суурийг тууштай баримталж байсан.
• Б.Ринчен өөрийн бүтээсэн хөдөлмөр зүтгэлийнхээ ачаар төрийн дээд шагнал Алтан гадас одон, Хөдөлмөрийн гавъяаны одон, МЗЭ-ийн шагнал, "Цогт тайж" зохиолоороо Маршал Чойбалсангийн нэрэмжит шагналыг хүртсэн.